ನಿಮ್ಮೊಳಗೊಬ್ಬ ಬಾಲು [ one among you ]

ವೆಂಕಟ ರಮಣ ಗೋವಿಂದ ,ಬನದೊಳಗೆ ನಲಿದಿಹ ವೆಂಕಟೇಶ!! ನೆನಪಿನ ಪುಟ :05

2012-02-10T06:21:00.001+05:30

ವನಸಿರಿಯ ನಡುವೆ ದೇವಾಲಯ.

ಹಸಿವಿನಿಂದ ಕಂಗಾಲಾಗಿ ಹೊನ್ನ ಮೇಟಿ ಬೆಟ್ಟ ದಿಂದ ಹೊರಟ ನಾವು ಗಿರಿಗಳನ್ನು ನಿಧಾನವಾಗಿ ಇಳಿಯ ತೊಡಗಿದೆವು.ಮೊದಲೇ ನಿತ್ರಾಣ ಯಾರಿಗೂ ಮಾತಾಡುವ ಆಸಕ್ತಿಹಾಗು ಶಕ್ತಿ ಇರಲಿಲ್ಲ.ಮಾರ್ಗ ಮಧ್ಯದಲ್ಲಿ ಬಾಲು, ಬಾಲು ಬೇಗ ಆ ಪಕ್ಷಿ ಫೋಟೋ ತೆಗೀರಿ ಅಂದ್ರೂ ವೇಣು , ಎಲ್ಲಿ ಎಲ್ಲಿ ಅಂತಾ ನಾನು ಹುಡುಕೋ ಅಷ್ಟರಲ್ಲಿ ಆ ಹದ್ದು ಹಾರಿಹೋಗಿತ್ತು. ಹಸಿವಿಂದ ಬಳಲಿದ್ದ ದೇಹ ಹಾಗು ನನ್ನ ಕಣ್ಣುಗಳು ಮುಂದೆಯೇ ಕುಳಿತಿದ್ದ ದೈತ್ಯಾಕಾರದ ಆ ಹದ್ದನ್ನು ಗುರುತಿಸಲು ವಿಫಲವಾಗಿತ್ತು.

ಮನಸೆಳೆವ ನೋಟ ನೀಡಿದ ಕೋಡುಗಲ್ಲುಗಳು

ಪಯಣ ಸಾಗಿತ್ತು ಹಾದಿಯಲ್ಲಿ ಹಸಿವನ್ನು ಮರೆಸಿ ಖುಶಿನೀಡಿದ ಎರಡು ಕೋಡುಗಲ್ಲುಗಳು ಮನಸೆಳೆದವು ಹಾಗು ಹೀಗೂ ಹೊನ್ನ ಮೇಟಿ ಎಸ್ಟೇಟ್ ತಲುಪಿ ನಿಟ್ಟುಸಿರು ಬಿಟ್ಟೆವು.ಆ ಜಾಗ ತಲುಪಿದ ಕೂಡಲೇ "ಸಾ ಇಲ್ಲೇ ಇರಿ ಇಲ್ಲೊಂದು ದೇವಸ್ತಾನ ಐತೆ ನೋಡೋರಂತೆ, " ಅಂತಾ ಅರಣ್ಯ ಇಲಾಖೆ ಸಿಬ್ಬಂಧಿ ಪೂಜಾರಿಯನ್ನು ಕರೆಯಲು ತಯಾರಾಗುತ್ತಿದ್ದರು.ಹೊಟ್ಟೆಯಲ್ಲಿ ಹಸಿವಿನ ಮಾಯೆ ಆವರಿಸಿದ್ದ ಕಾರಣ ಅವರನ್ನು ತಡೆದು ಮೊದಲು ಅಲ್ಲೇ ಕಾಣಿಸಿದ ಸಣ್ಣ ಪೆಟ್ಟಿಗೆ ಅಂಗಡಿಯಲ್ಲಿ ಬಿಸ್ಕತ್ತು, ಬಾಳೆಹಣ್ಣು , ಟೀ ಸೇವಿಸಿ ಸ್ವಲ್ಪ ಮಟ್ಟಿಗೆ ಹಸಿವನ್ನು ತಣಿಸಿದೆವು.ಅರಣ್ಯ ಸಿಬ್ಬಂಧಿ ಪುರೋಹಿತರನ್ನು ಕರೆತರುವುದಾಗಿ ಹೇಳಿ ಹೊರಟರು ,ನಾವು ಸುತ್ತ ಮುತ್ತ ಪ್ರದೇಶದ ವೀಕ್ಷಣೆಯಲ್ಲಿ ತೊಡಗಿದೆವು.

ಗಣಪತಿ ಗುಡಿ

ಗಣಪತಿ ಬಪ್ಪ ಮೊರ್ಯ

ಅಲ್ಲೇ ಇದ್ದ ಒಂದು ಪುಟ್ಟ ಗಣಪತಿ ಗುಡಿ ಕಣ್ಣಿಗೆ ಬಿತ್ತು ಹತ್ತಿರ ಹೋಗಿ ದರ್ಶನ ಪಡೆದೆವು ಸುಂದರ ಮೂರ್ತಿ ಆ ಪ್ರದೇಶದ ಹಾದಿಯ ಕೇಂದ್ರ ಭಾಗದ ವೃತ್ತದಲ್ಲಿ ನೆಲೆಗೊಂಡಿತ್ತು. ಅಷ್ಟರಲ್ಲಿ ಪುರೋಹಿತರ ಆಗಮನವಾಯಿತು, ಪರಸ್ಪರ ಪರಿಚಯ ಆದನಂತರ ಬನ್ನಿ ದೇವಾಲಯ ನೋಡೋಣ. ಅಂದರು ದಾರಿಯಲ್ಲಿ ಹೋಗುತ್ತಾ ಹೋಗುತ್ತಾ ತಾವು ಶೃಂಗೇರಿ ಕಡೆಯವರೆಂದೂ , ಈ ಎಸ್ಟೇಟ್ ನಲ್ಲಿ ರೈಟರ್ ಹಾಗು ಈ ದೇವಾಲಯದಲ್ಲಿ ಅರ್ಚಕರಾಗಿ ಕಾರ್ಯ ನಿರ್ವಹಣೆ ಮಾಡುವುದಾಗಿ ತಿಳಿಸಿ ಆತ್ಮೀಯವಾಗಿ ಮಾತಾಡಿದರು.

ಸುಂದರ ದೇವಾಲಯ ನೋಟ

ಸುಂದರ ದೇವಾಲಯದ ಅನಾವರಣ ಸುಂದರ ಪರಿಸರದ ನಡುವೆ ನಮಗೆ ಹೊಸ ಚೈತನ್ಯ ತಂದಿತು.ಆದರೂ ಈ ಭವ್ಯ ದೇವಾಲಯವನ್ನು ಈ ಕಾಡಿನಲ್ಲಿ ನಿರ್ಮಿಸಿದ್ದು ಯಾರು, ಇಲ್ಲಿಗೆ ಹೆಚ್ಚಿಗೆ ಜನ ಬರೋದಿಲ್ಲ , ದೇವಾಲಯ ನಿರ್ವಹಣೆ ಹೇಗೆ ಮಾಡ್ತಾರೆ ಎಂಬ ಅಚ್ಚರಿ ಉಂಟಾಯಿತು. ಈ ದೇವಾಲಯವನ್ನು ಹೊನ್ನ ಮೇಟಿ ಎಸ್ಟೇಟಿನ ಮಾಲಿಕರಾದ ಬಿರ್ಲಾ ಸಂಸ್ಥೆಯವರು ನಿರ್ಮಿಸಿದ್ದಾಗಿ ತಿಳಿದುಬಂತು. ದೇವಾಲಯವನ್ನು ತಮ್ಮ ಖಾಸಗಿ ಉಪಯೋಗಕ್ಕಾಗಿ ಕಟ್ಟಿಸಿದ್ದು,ಸಾರ್ವಜನಿಕರಿಗೂ ಪ್ರವೇಶಇರುವುದಾಗಿ ಅಲ್ಲಿನ ಜನ ತಿಳಿಸಿದರು.

ಕಾಡಿನಲ್ಲಿ ನೆಲೆನಿಂತ ವೆಂಕಟರಮಣ

ಕಾಡಿನ ಸೊಬಗಿನ ತೀರ್ಥ ಪ್ರಸಾದ

ಅರ್ಚಕರು ನಮ್ಮ ಹೆಸರಿನಲ್ಲಿ ಪೂಜೆಮಾಡಿ ಮಂಗಳಾರತಿ,ತೀರ್ಥ ಪ್ರಸಾದ ನೀಡಿ ಹರಸಿದರು.ಸರಿ ದೇವಾಲಯ ವೀಕ್ಷಣೆ ಮಾಡಲು ಅಲ್ಲಿನ ಚಿತ್ರ ತೆಗೆಯಲು ಅನುಮತಿಪಡೆದು ಕೆಲವು ಚಿತ್ರಗಳನ್ನು ತೆಗೆದೆವು, ಸುಮಾರು ಕೋಟಿ ಬೆಲೆಬಾಳುವ ಅಮೃತ ಶಿಲೆಯಿಂದ ಅಲಂಕೃತ ಗೊಂಡ ದೇವಾಲಯ ಮನಸೂರೆಗೊಂಡಿದ್ದು ಸುಳ್ಳಲ್ಲಾ , ದೇವಾಲಯ ಪ್ರದಕ್ಷಿಣೆ ಹಾಕುವಾಗ

ಪ್ರದಕ್ಷಿಣೆ ಪಥ

ಗರುಡ

ಶಂಖ

ಚಕ್ರ

ಓಂ ಕಲಾಕೃತಿ

ಪ್ರದಕ್ಷಿಣೆ ಮಾಡಲು ಸುಂದರ ಆವರಣ ,ಗರುಡ ,ಶಂಖ , ಚಕ್ರ, ಓಂ ಮುಂತಾದ ಸುಂದರ ಕಲಾಕೃತಿಗಳು ಮನಸೆಳೆದವು.ಸುಂದರ ನೋಟ ಮನ ಸೂರೆಗೊಂಡು ಹರುಷದಿಂದ ಹೊರಡಲು ತಯಾರಾದೆವು

ಶುಭ ವಿದಾಯ

.ನಮ್ಮನ್ನು ಬೀಳ್ಕೊಟ್ಟ ಪುರೋಹಿತರು ದೇವಾಲಯದ ಬಾಗಿಲನ್ನು ಮುಚ್ಚುತಿದ್ದರು ನಮ್ಮ ಬರುವಿಕೆಗಾಗಿ

ಎಷ್ಟು ಹೊತ್ತು ಕಾಯೋದು ಇವರನ್ನಾ

ಗನ್ ಹಿಡಿದು ಅರಣ್ಯ ಸಿಬ್ಬಂದಿ ಕಾಯುತ್ತಿದ್ದರು.........................!!!!!

ಬನ್ನಿ ಹೋಗೋಣ ಹೊನ್ನ ಮೇಟಿ ಬೆಟ್ಟಕ್ಕೆ !!!ನೆನಪಿನ ಪುಟ ...04

2012-02-04T17:46:00.003+05:30

ಮುಂಜಾವಿನ ಚಳಿಗೆ ಬೆಂಕಿಯ ಆಸರೆ.

ಬುರುಡೆ ಕ್ಯಾಂಪಿನಲ್ಲಿ ರಾತ್ರಿ ಮಲಗಿದ ನಮಗೆ ಬಳಲಿಕೆಯಿಂದ ನಿದ್ದೆ ಬಂದು ಎಚ್ಚರವಾದಾಗ ದೂರದಲ್ಲಿ ಹಕ್ಕಿಗಳ ಚಿಲಿಪಿಲಿ , ನವಿಲಿನ ಕೂಗು ಕೇಳುತ್ತಲಿತ್ತು , ಕ್ಯಾಂಪಿನ ಹೊರಗೆ ಬಂದು ನೋಡಿದರೆ ಚಳಿ ಚಳಿ ನಡುಕ ಶುರು ಆಯ್ತು ,ಅಡಿಗೆ ಮನೆ ಮುಂದೆ ಆನೆ ಬೆಂಕಿ [ ರಾತ್ರಿವೇಳೆ ಕಾಡು ಪ್ರಾಣಿಗಳು ಹತ್ತಿರ ಬರದಿರಲಿ ಎಂದು ಹಾಕುವ ಬೆಂಕಿ..... ನಾವು ಅದನ್ನು ಆನೆ ಬೆಂಕಿ ಅಂದೆವು.] ಉರಿಯುತ್ತಿತ್ತು.ನಾವೂ ಹತ್ತಿರ ಹೋದೆವು ಬೆಂಕಿಯ ಹಿತವಾದ ಶಾಖಕ್ಕೆ ದೇಹವನ್ನು ಒಡ್ಡಿ ಕುಳಿತೆವು, ಸಾ ಟೀನೋ..... ಕಾಪಿನೋ .. ಅಂದರು ಗಾರ್ಡ್, ಚಳಿಯಿದೆ ಕಾಫಿನೇ ಮಾಡಿ ಅಂದೆವು , ತೆಗೆದು ಕೊಂದು ಹೋಗಿದ್ದ ಸ್ಕಿಮ್ಮೆಡ್ ಮಿಲ್ಕ್, ಹಾಗು ಬ್ರೂ ಕಾಫಿಪುದಿಯಿಂದ ಕ್ಷಣದಲ್ಲಿ ಕಾಫಿ ತಯಾರ್, .......ಬಿಸಿ ಬಿಸಿ ಕಾಫಿ ಕುಡಿದು ತಯಾರಾದೆವು,ಇವತ್ತು "ಹೊನ್ನ ಮೇಟಿ ಕಲ್ಲು " ಕಾರ್ಯಕ್ರಮ ಇದೆ ಎಷ್ಟೊತ್ತಿಗೆ ಹೊರಡೋದು , ಅದು ಎಷ್ಟು ದೂರ ಇದೆ ,ಮಧ್ಯಾಹ್ನ ಊಟಕ್ಕೆ ಇಲ್ಲೇ ಬರಬಹುದಾ ಅಂತಾ ನೂರಾರು ಪ್ರಶ್ನೆ ನಮ್ಮಿಂದ ಆರಣ್ಯ ಇಲಾಖೆ ಸಿಬ್ಬಂಧಿಗೆ ಅವರು ಇನ್ನೆನುತಿಂಡಿ ತಿಂದು ಹೊರಡೋಣ ಸರ್ , "ಹೊನ್ನ ಮೇಟಿ ಕಲ್ಲು" ಇಲ್ಲೇ ಹತ್ರಾ ಮಧ್ಯಾಹ್ನ ಊಟಕ್ಕೆ ಇಲ್ಲೇ ಇರಬಹುದು ಅಂದರು. ಸರಿ ಅಂತಾ ನಾವೂಸಿದ್ದರಾಗಿ ಬೆಳಗಿನ ಉಪಹಾರ, ಅವರೆಕಾಳಿನ.. ಉಪ್ಪಿಟ್ಟು,ಸ್ವಲ್ಪ ಸ್ವೀಟುಗಳು,ಕುರುಕಲು ತಿಂಡಿ, ಟೀ ಸೇವಿಸಿ ಸಿದ್ದರಾಗಿ ಕಾರಿನ ಬಳಿ ಬಂದೆವು.ಸಾ ಬೇಗ ಬಂದ್ಬಿಡಿ ಮಧ್ಯಾನ ಊಟಕ್ಕೆ ಅಂದರು ಒಬ್ಬರು ಗಾರ್ಡ್ , ಜೊತೆಯಲ್ಲಿ "ಹೊನ್ನ ಮೇಟಿ ಕಲ್ಲು" ತೋರಿಸಲು ಮತ್ತೊಬ್ಬರು ಸಿಬ್ಬಂದಿ ಬಂದರು, ಪಯಣ ಆರಂಭ.
ಕಾಡಿನ ಗೇಂ ರೂಟ್ ನಲ್ಲಿ ನಿಧಾನವಾಗಿ ಚಲಿಸಿತ್ತು ಸಫಾರಿ ಕಾರು.ದಾರಿಯುದ್ದಕ್ಕೂ ಕಾಡಿನ ಹಾದಿಯಲ್ಲಿ ಸುಂದರ ದೃಶ್ಯಗಳ ಅನಾವರಣ. ಕಾರಿನ ಸುಂದರ ಪುಷ್ಪಗಳ ದರ್ಶನ ನಡೆದಿತ್ತು.

ಸುಂದರ ವನಸಿರಿ

ಹಸಿರಹೊದಿಕೆ ಹೊದ್ದ ಭೂರಮೆ

ಹೊನ್ನ ಮೇಟಿ ಕಲ್ಲು ನಾವಿದ್ದ ಬುರುಡೆ ಕ್ಯಾಂಪಿನಿಂದ ಸುಮಾರು ಇಪ್ಪತ್ತು ಕಿ.ಮಿ ದೂರವಿತ್ತು, ಹೆದ್ದಾರಿಗಳಲ್ಲಿ ಇದು ಕಾಲು ಘಂಟೆಯ ಹಾದಿಯಾದರೂ ಕಾಡಿನ ಬೆಟ್ಟಗಳನ್ನು ಬಳಸಿ ಸಾಗುವ ಗೇಂ ರೂಟಿನಲ್ಲಿ ಒಂದು ಕಿ.ಮಿ.ಕ್ರಮಿಸಲು ಕನಿಷ್ಠ ಹತ್ತು ನಿಮಿಷ ಬೇಕಾಗುತ್ತದೆ.ಹಾದಿಯ ಎರಡೂ ಬದಿಯ ಕಾಡಿನ ಒಳಗಿಂದ ಯಾವ ಕ್ಷಣದಲ್ಲಾದರೂ ಆನೆ, ಜಿಂಕೆ, ಹುಲಿ ,ಚಿರತೆ,ಕಾಟಿ, ಮುಂತಾದ ವನ್ಯ ಜೀವಿಗಳು ಸಾಗುವ ಹಾದಿಗೆ ಅಡ್ಡಲಾಗಿ ನುಗ್ಗಬಹುದು. ಹಾಗಾಗಿ ನಿಶ್ಯಬ್ದವಾಗಿ ಕ್ಯಾಮರ ಹಿಡಿದು ಕುಳಿತ್ತಿದ್ದೆವು, ವೇಣು ಮಾತ್ರ ತದೇಕ ಚಿತ್ತರಾಗಿ ವಾಹನ ಚಾಲನೆಯ ಕಾರ್ಯದಲ್ಲಿ ತಲ್ಲೀನರಾಗಿದ್ದರು.ದಾರಿಯಲ್ಲಿ ಪ್ರತ್ಯಕ್ಷವಾಯಿತು ಕಿತ್ತಲೆಮರ ಹಾಗು ಕಾಫಿ ಗಿಡಗಳ ಸಾಲು. ನಮಗೆ ಅಚ್ಚರಿ ಇದ್ಯಾರಪ್ಪಾ ಈ ದತ್ತ ಕಾಡಿನಲ್ಲಿ ಕಿತ್ತಳೆ ಹಾಗು ಕಾಫಿ ಬೆಳೆಯೋರು ಅಂತಾ , ವಿಚಾರಿಸಲಾಗಿ ಇದು ಬಿರ್ಲಾಸಂಸ್ಥೆಯ ಗುಂಪಿಗೆ ಸೇರಿದ "ಹೊನ್ನ ಮೇಟಿ ಎಸ್ಟೇಟ್" ಎಂದು.ಕಾಡಿನ ನಡುವೆ ಸಾವಿರಾರು ಎಕರೆ ಪ್ರದೇಶದಲ್ಲಿ ಹೊನ್ನ ಮೇಟಿ ಎಸ್ಟೇಟ್ ಇದೆ.ವಿಶ್ರಾಂತಿಗಾಗಿ ಇಳಿದ ನಾವು ಹಾಗೆ ಅದಾಡಿ ಅಲ್ಲಿದ್ದ ಸಿಬ್ಬಂದಿ ಅನುಮತಿ ಪಡೆದು ಗಿಡದಲ್ಲೇ ಹಣ್ಣಾದ ಕಿತ್ತಳೆ ಹಣ್ಣನ್ನು ಕಿತ್ತು ತಿಂದು ಖುಷಿಪಟ್ಟೆವು,

ಮರದಲ್ಲೇ ಹಣ್ಣಾದ ಕಿತ್ತಳೆ ಹಣ್ಣು

ಅಕ್ಕ ಪಕ್ಕದ ಹಾದಿಯಲ್ಲಿ ಕಾಫಿ ಗಿಡದಿಂದ ಕಾಫಿ ಕಾಯಿ, ಹಾಗು ಹಣ್ಣುಗಳ ಘಮ ಘಮ ವಾಸನೆ ನಮ್ಮ ಮನಸನ್ನುಪ್ರಶಾಂತ ಗೊಳಿಸಿತ್ತು.

ಕಾಫಿ ಹಣ್ಣು ಹಾಗು ಕಾಯಿ ಹೊತ್ತ ಕಾಫಿಗಿಡ

ಕಾಫಿ ಹಣ್ಣಿನ ಗೊಂಚಲು

ಕಾಫಿ ಗಿಡದಲ್ಲಿ ಕಾಯಿಗಳ ನಡುವೆ ಹಣ್ಣಾದ ಕಾಫಿ ಹಣ್ಣು.

ಅದ್ಯಾವ ಮಾಯದಲ್ಲೋ ನಮ್ಮಲ್ಲಿನ ಕೆಲವರಿಗೆ ಜಿಗಣೆಗಳು [ಇಂಬಳಿ ] ಕಾಲಿಗೆ ಹತ್ತಿದ್ದವು .ಅವುಗಳನ್ನು ಕೊಡವಿಕೊಂಡು ಪಯಣ ಮುಂದುವರೆಯಿತು.

ಕಡಿದಾದ ಹಾದಿಯಲ್ಲಿ

ಮುಂದಿನ ಹಾದಿ ಬಹಳ ಕಷ್ಟದ ಹಾದಿಯೇ ಸರಿ , ವಾಹನ ಚಾಲಕರಿಗೆ ಈ ದಾರಿಯಲ್ಲಿ ಸಾಗಲು ಗಟ್ಟಿಯಾದ ಗುಂಡಿಗೆ ಬೇಕು ,ಸಮುದ್ರ ಮಟ್ಟದಿಂದ ಸುಮಾರು 2500 ಅಡಿಗಳಿಗೂ ಎತ್ತರದ ಬೆಟ್ಟಗಳ ಸಾಲಿನ ನಡುವೆ ಸಾಗುವ ಇಕ್ಕಟ್ಟಿನ ಹಾದಿ ಆಯತಪ್ಪಿದರೆ ಪಾತಾಳ ಕಾಣಿಸುತ್ತದೆ ನಾವೂ ಸಹ ಇಷ್ಟು ಎತ್ತರದ ಪ್ರದೇಶದಲ್ಲಿ ಕಾರು ಇಕ್ಕಟ್ಟಾದ ಹಾದಿಯಲ್ಲಿ ಚಲಿಸುವಾಗ ಕಾಣುತ್ತಿದ್ದ ಪ್ರಪಾತಗಳನ್ನು ನೋಡಿ ಉಸಿರು ಬಿಗಿಹಿಡಿದು ಮಿಸುಕಾಡದೆ ಕುಳಿತ್ತಿದ್ದೆವು. ಅರಣ್ಯ ಸಿಬ್ಬಂದಿ ಮಾತ್ರ ತನಗೂ ಇದಕ್ಕೂ ಸಂಬಂದ ವಿಲ್ಲ ಅಂತಾ ಸ್ಥಿತ ಪ್ರಜ್ಞನಂತೆ ಕುಳಿತಿದ್ದರು. ಇಂತಹ ಸಮಯದಲ್ಲೂ ತಾಳ್ಮೆ ಕಳೆದುಕೊಳ್ಳದೆ ವಾಹನ ಚಲಿಸಿದ ವೇಣುಗೋಪಾಲ್ ನಮ್ಮನ್ನು ಸುರಕ್ಷಿತವಾಗಿ ಹೊನ್ನಮೇಟಿ ಕಲ್ಲು ಪ್ರದೇಶ ತಲುಪಿಸಿದರು.

ಹೊನ್ನ ಮೇಟಿ ಕಲ್ಲಿನಿಂದ ಕಾಣುವ ಗಿರಿ ಶ್ರೇಣಿ

ಹೊನ್ನ ಮೇಟಿ ಕಲ್ಲು ಬಿಳಿಗಿರಿ ರಂಗನ ಬೆಟ್ಟದ ಗಿರಿ ಶ್ರೇಣಿಯಲ್ಲೇ ಅತೀ ಎತ್ತರದ ಗಿರಿಪ್ರದೇಶ.ಇಲ್ಲಿ ಅರಣ್ಯ ಇಲಾಖೆಯ ಒಂದು anti poaching camp ಇದೆ. ಅಚ್ಚರಿಎಂದರೆ ಇಲ್ಲಿ ಬೆಟ್ಟದ ತುದಿಯಲ್ಲಿ ಕಲ್ಲಿನ ಮನೆ ನಿರ್ಮಿಸಲಾಗಿದೆ ಯಾವ ಪುಣ್ಯಾತ್ಮ ಕಟ್ಟಿದನೋ ಕಾಣೆ ಅಂಚಿನಲ್ಲಿ ಎತ್ತರದ ಬೆಟ್ಟದ ಮೇಲೆ ಒಂದು ಅಂಚಿನಲ್ಲಿ ಕಟ್ಟಲಾಗಿದೆ.

ಕಾಡು ಕಳ್ಳರ ತಡೆ ಕೇಂದ್ರ

ಗೊತ್ತಿಲ್ಲದೇ ಸ್ವಲ್ಪ ಯಾಮಾರಿದರೂ ಪಾತಾಳ ಸೇರುವುದು ಗ್ಯಾರಂಟೀ . ಅಲ್ರೀ ಇಷ್ಟು ಎತ್ತರ ಬಂದು ಇಲ್ಲಿ ಯಾರು ಕಾಡು ಕಡೀತಾರೆ ರೀ , ಜೊತೆಗೆ ಇಷ್ಟು ಎತ್ತರಕ್ಕೆ ಯಾವ ಪ್ರಾಣಿ ಬರುತ್ತೆ ಸುಮ್ನೆ ವೇಸ್ಟು ಇಲ್ಲಿನ ಪೋಸ್ಟು ಅಂದೇ, ಅದಕ್ಕೆ "ಇಲ್ಲಾ ಸಾ ಮನ್ಸಾ ಯಾವ್ ತವು ಬೇಕಾದರೂ ನುಗ್ಗಿ ಕದೀತಾನೆ ...ನಾಮೇ ಎಷ್ಟೋ ಇಲ್ಲಿ ಹಿಡಿದು ಹಾಕಿದ್ದೀವಿ" ಅಂದ್ರೂ ಅಲ್ಲಿನ ಸಿಬ್ಬಂದಿ ಪ್ರಾಣಿ ಬರಕ್ಕಿಲ್ಲಾ ಅಂದ್ರಲ್ಲಾ ಅಲ್ಲಿ ನೋಡಿ ನೀವೇ ಅಂತಾ ಕೈ ತೋರಿದರು , ಪಕ್ಕದ ಬೆಟ್ಟದ ಮೇಲೆ ದೂರದಲ್ಲಿ ಒಂದು ಸಾರಂಗ ನಮ್ಮನ್ನು ಅಣಕಿಸುತ್ತಾ ನಿಂತಿತ್ತು.

ನೋಡ್ರೀ ನಾನು ಇಲ್ಲಿದ್ದೇನೆ ಅಂದಿತ್ತು ಸಾರಂಗ

ಅದನ್ನು ನೋಡೇ ಆನ್ಸಿತ್ತು ನಾವು ವನ್ಯ ಜೀವಿಗಳಬಗ್ಗೆ ಇನ್ನೂ ಹೆಚ್ಹಾಗಿ ಅರಿತಿಲ್ಲವೆಂದು. ಅಷ್ಟೇ ಅಲ್ಲಾ ಸಾ ಇಲ್ಲಿಗೆ ಆನೆ , ಕಾಟಿ[ ಕಾಡೆಮ್ಮೆ ] , ಜಿಂಕೆ, ಹುಲಿ ಬತಾ ಇರ್ತವೆ ಅಂದರು. ಇಷ್ಟು ಎತ್ತರದ ಪ್ರದೇಶಕ್ಕೆ ಆನೆ ಬರುವುದು ಆಚರಿಯೇ ಸರಿ ಅಂದುಕೊನದ ನಾವು , ಸರಿ ಇಲ್ಲಿ ಹೊನ್ನ ಮೇಟಿ ಕಲ್ಲು ಎಲ್ಲಿದೆ ಈ ಜಾಗಕ್ಕೆ ಯಾಕೆ ಈ ಹೆಸರು ಬಂತೂ ಅಂತಾ ಕೇಳಿದರೆ , ಅಲ್ಲಿನ ಸಿಬ್ಬಂದಿ ಒಂದು ಕೋಡುಕಲ್ಲು ಬಂಡೆಯ ಕಡೆ ಕರೆದೊಯ್ದರು , ಇದೆಯಾ ಸಾ "ಹೊನ್ನ ಮೇಟಿ ಕಲ್ಲು ", ಈ ಕಲ್ಲಿನಿನ್ದಾನೆ ಇಲ್ಲಿಗೆ ಆ ಹೆಸರು ಬಂದದೆ ಅಂದ್ರೂ , ಇದ್ರ ವಿಸೇಸ ಗೊತ್ತಾ ಸಾ ಕಲ್ಲನ್ನು ಕೈನಿಂದ ಕುಟ್ಟಿದರೆ ಕಲ್ಲಿನ ಶಬ್ದ ಬರಾಕಿಲ್ಲಾ ಬೇರೆ ಶಬ್ದ ಬತ್ತುದೆ ಅಂದ್ರೂ ...!!,

ಹೊನ್ನ ಮೇಟಿ ಕಲ್ಲು

ಹತ್ತಿರ ಹೋಗಿ ನೋಡಿದರೆ ಆ ಕೋಡುಕಲ್ಲು ಬೆಟ್ಟದ ಅಂಚಿನಲ್ಲಿ ಕುಳಿತಿತ್ತು. ಕಲ್ಲಿನ ಸಮೀಪ ತೆರಳಿ ಕಿವಿಯನ್ನು ಕಲ್ಲಿಗೆ ಆನಿಸಿ ಕೈನಿಂದ ಕಲ್ಲನ್ನು ಕೈನಿಂದ ಕುಟ್ಟಿದರೆ ಅರೆ ಇದೇನಿದು ಯಾವುದೋ ತಾಮ್ರದ ವಸ್ತುವನ್ನು ಕುಟ್ಟಿದರೆ ಬರುವ ಶಬ್ದ ಬರುತ್ತಿದೆ.ಅತೀ ಎತ್ತದ ಶಿಖರದ ಮೇಲೆ ಕುಳಿತ ಈ ಕೋಡುಗಲ್ಲು ತನ್ನ ವಿಸ್ಮಯವನ್ನು ತನ್ನ ಒಡಲಲ್ಲೇ ಅಡಗಿಸಿಕೊಂಡು ಮೆರೆದಿತ್ತು. ಹಾಗೆ ಗಿರಿಯ ಮೇಲಿಂದ ಕಾಣುವ ದೃಶ್ಯಾವಳಿಯ ಸೆರೆ ಹಿಡಿಯಲು ತೊಡಗಿದೆವು

ಕಾಡಿನ ನಡುವೆ ಮತ್ತೊಂದು ಕಾವಲು ಮನೆ

ದೂರದಲ್ಲಿ ಪಾತಾಳದಲ್ಲಿ ಕಾಡಿನ ನಡುವೆ ಮತ್ತೊಂದು anti poaching camp ಕಾಣುತ್ತಿತ್ತು ಮತ್ತೊಂದು ಕಡೆ ರಮಣೀಯ ಗಿರಿಗಳ ಶ್ರೇಣಿ ಸುಮಾರು ಸಮಯ ಕಳೆದ ನಮಗೆ ಹೊಟ್ಟೆಯ ಹಸಿವಿನ ಅಲಾರಂ ಬಂದಾಗಲೇ ವಾಸ್ತವ ಲೋಕಕ್ಕೆ ಬಂದು ವೇಳೆ ನೋಡಿದರೆ ಆಗಲೇ ಮಧ್ಯಾಹ್ನದ ಊಟದ ಸಮಯ ಮೀರಿತ್ತು. ಮಧ್ಯಾಹ್ನದ ಊಟಕ್ಕೆ ಬುರುಡೆ ಕ್ಯಾಂಪಿಗೆ ಬರುವುದಾಗಿ ಹೇಳಿ ಜೊತೆಯಲ್ಲಿ ತಿನ್ನಲು ಏನೂ ತಂದಿರಲಿಲ್ಲ. ಹಸಿವು ತನ್ನ ನರ್ತನ ಶುರುಮಾಡಿತ್ತು. ಹೊನ್ನ ಮೇಟಿ ಕಲ್ಲಿನ ಪ್ರದೇಶದಿಂದ ವಾಪಸ್ಸು ಹೊರಟೆವು. ಹಸಿವು ತನ್ನ ಪ್ರತಾಪ ತೋರುತ್ತಲೇ ನಮ್ಮ ದೇಹದ ಶಕ್ತಿಯನ್ನು ಅಡಗಿಸುತ್ತಿತ್ತು ............!!! ಮುಂದೆ...........?????? ........................... ವೆಂಕಟ ರಮಣ ಗೋವಿಂದ

ಕಾಡಿನಲ್ಲಿ ಜಗದ ಕಣ್ಣಿಗೆ ಕಾಣದೆ ಅಡಗಿದೆ ವಿಸ್ಮಯಗಳ ಬುರುಡೆ ಕ್ಯಾಂಪು !!!! ನೆನಪಿನ ಪುಟ --03

2012-01-24T18:36:00.007+05:30

ಬುರುಡೆ ಕ್ಯಾಂಪು

ಕಳೆದ ಸಂಚಿಕೆಯಲ್ಲಿ ಗುಂಡಾಲ್ ಅಣೆಕಟ್ಟಿನಿಂದ ಬುರುಡೆ ಹಾದಿಯ ಅನುಭವಗಳನ್ನು ಓದಿ ಮೆಚ್ಚಿದ್ದೀರಿ , ಬನ್ನಿ ಮುಂದೆ ಸಾಗೋಣ ............... ಗುಂಡಾಲ್ ನಿಂದ ಬಂದ ನಮಗೆ ಈ ಬುರುಡೆ ಕ್ಯಾಂಪ್ ನಲ್ಲಿ ಇಂದಿನ ವಾಸ್ತವ್ಯ ಆಗಿತ್ತು.ನಮ್ಮ ಲಗೇಜುಗಳನ್ನು ಕಾರಿನಿಂದ ಇಳಿಸಿ , ತಂದಿದ ರೇಶನ್ , ಹಾಗು ರೆಡಿ ಟು ಈಟ್ ನ ಕೆಲವು ಸಾಮಗ್ರಿಗಳನ್ನು ಅಲ್ಲಿನ ಸಿಬ್ಬಂದಿಗಳ ಕೈಗೆ ಹಸ್ತಾಂತರಿಸಿದೆವು. ಅಲ್ಲಿನ ಸಿಬ್ಬಂದಿಗೆ ನಾವು ಬರುವ ಮಾಹಿತಿ ಮೊದಲೇ ತಿಳಿದಿದ್ದ ಕಾರಣ. ನಮಗೆ ಆ ತಾಣದಲ್ಲಿ ರೂಂ ಗಳನ್ನು ಒದಗಿಸಿದರು. ಆಯಾಸವಾಗಿ ಸ್ವಲ್ಪ ವಿಶ್ರಾಂತಿ ಪಡೆಯುತ್ತಿದ್ದ ನಮಗೆ ತಿನ್ನಲು ಬಿಸ್ಕತ್ತು , ಮಿಕ್ಸ್ಚರ್ ಹಾಗು ಟೀ ತಂದ ಒಬ್ಬ ಸಿಬ್ಬಂದಿ ಸಾ ತಗಳಿ, ಅಂತಾ ತಂದಿಟ್ಟರು. ತಂದಿಟ್ಟ ಕಪ್ಪುಗಳ ಮೇಲೆ ಅರಣ್ಯ ಇಲಾಖೆಯ ಮುದ್ರೆ ಹಾಗು ಹುಲಿಯ ಚಿತ್ರ ನೋಡಿ ಸಂತಸವಾಯಿತು.

ಕಪ್ಪಿನ ಮೇಲೂ ವನ್ಯ ಜೀವಿ ಚಿತ್ರ

ಬಹಳ ಖುಷಿಯಿಂದ ಇದನ್ನು ತಿಂದು ಮುಗಿಸಿದ ನಾವು ಅಲ್ಲಿನ ಸುತ್ತ ಮುತ್ತ ಪರಿಸರ ಪರಿಚಯ ಮಾಡಿಕೊಳ್ಳಲು ಕ್ಯಾಮರ ಹೊತ್ತು ನಡೆದೆವು. ಬನ್ನಿ ಇಲ್ಲಿನ ಪರಿಸರ ಪರಿಚಯ ಮಾಡಿಕೊಳ್ಳೋಣ.

ಬುರುಡೆ ಕ್ಯಾಂಪ್ ಅನ್ನೋದು ದಟ್ಟ ಕಾಡಿನ ನಡುವೆ ಇರುವ ಒಂದು ಬಂಗಲೆ 1941 ರಲ್ಲಿ ನಿರ್ಮಾಣವಾದ ಇದು ಹಿಂದೆ ರಾಜ ಮಹಾರಾಜರು ಇಲ್ಲಿ ಬಂದು ಉಳಿಯುತ್ತಿದ್ದರು ಎಂದು ಕಂಡು ಬರುತ್ತದೆ . ಹಾಲಿ ಈ ಬಂಗಲೆ ಅರಣ್ಯ ಇಲಾಖೆಗೆ ಸೇರಿದ್ದು ಇದನ್ನು ಕಾಡು ಕಳ್ಳರ ನಿಯಂತ್ರಣ ಕೇಂದ್ರವನ್ನಾಗಿ ಮಾಡಿ ಕೊಳ್ಳಲಾಗಿದೆ. ಬಂಗಲೆಯ ಸುತ್ತಾ ಆನೆಗಳ ಹಾವಳಿ ತಡೆಗಟ್ಟಲು ಕಂದಕ ನಿರ್ಮಿಸಿದ್ದು , ರಾತ್ರಿವೇಳೆ ಇಲ್ಲಿ ಯಾವಾಗಲೂ ಬೆಂಕಿ ಉರಿಯುತ್ತಿರುತ್ತದೆ.ಇಲ್ಲಿನ ಸಂಪರ್ಕ ವೈರ್ಲೆಸ್ ಮೂಲಕ ಮಾತ್ರ ಸಾಧ್ಯ ಯಾವುದೇ ಮೊಬೈಲ್ ಇಲ್ಲಿ ಕನೆಕ್ಟ್ ಆಗಲ್ಲ. ಹಾಗಾಗಿ ನೀವು ನಾಗರೀಕ ಪ್ರಪಂಚದಿಂದ ಯಾವುದೇ ಸಂಪರ್ಕ ಸಾಧಿಸಲಾರಿರಿ. ಇನ್ನು ಇಲ್ಲಿನ ಬಂಗಲೆಯೋ , ಕಾಡಿನಲ್ಲಿಯ ವಿಸ್ಮಯವೇ ಸರಿ ಬನ್ನಿ ಪರಿಚಯ ಮಾಡಿಕೊಳ್ಳೋಣ. ಇಲ್ಲಿಗೆ ಬಂದೊಡನೆ ನಿಮ್ಮನ್ನು ಸ್ವಾಗತಿಸುವುದು ಒಂದು ಮರದ ಹೊರ ಆವರಣದ ವರಾಂಡ

ಬನ್ನಿ ನಿಮಗೆ ಸ್ವಾಗತ

ಬಹು ಚಟುವಟಿಕೆಗಳ ತಾಣ ಈ ವರಾಂಡ

ವರಾಂಡ ದಿಂದ ಕಾಣುವ ಕಾಡಿನ ಸೊಬಗು.

ಒಳಗೆ ಹೊಕ್ಕರೆ ನಿಮಗೆ ಅದರ ಸೌಂದರ್ಯದ ಅರಿವಾಗುತ್ತದೆ. ಹೌದು ಇಲ್ಲಿ ಇರುವವರೆಗೂ ನಿಮಗೆ ಈ ವರಾಂಡ ಊಟದ ಮನೆ, ವಿಶ್ರಾಂತಿ ತಾಣ , ನಿಮ್ಮ ಬಹಳಷ್ಟು ಚಟುವಟಿಕೆಗಳ ತಾಣ ವಾಗಿಬಿಡುತ್ತದೆ. ಮುಂಜಾನೆ ಎದ್ದು ಇಲ್ಲಿ ಕುಳಿತರೆ ನಿಮಗೆ ಕಾಡಿನ ಸೊಬಗು ಕಣ್ಣಿಗೆ ಕಟ್ಟುತ್ತದೆ. ಬಂಗಲೆಯ ಸುತ್ತಾ ಮರದ ಜಾಲರಿಯಂತಹ ಕಟ್ಟೆ ಕಟ್ಟಿದ್ದು ಬಂಗಲೆಯ ಸೊಬಗನ್ನು ಹೆಚ್ಚಿಸಿದೆ. ಒಳಗಡೆ ಎರಡು ರೂಂಗಳು ಇದ್ದು , ಒಂದು ಹಾಲ್ ಇದೆ. ಮೂರೂ ಜಾಗದಲ್ಲಿ ಮರದ ಮಂಚ ಹಾಕಿ ಉಳಿಯಲು ಅನುಕೂಲ ಮಾಡಿದ್ದಾರೆ. ಆದರೆ ನೆನಪಿರಲಿ, ಇಲ್ಲಿಗೆ ಟಿ.ವಿ., ಕರೆಂಟು ಯಾವುದೂ ಇಲ್ಲಾ , ಇತ್ತೀಚಿಗೆ ಎಲ್.ಈ.ಡಿ.ಬಲ್ಬುಗಳನ್ನು ಹಾಕಿ ಸೌರ ಶಕ್ತಿಯಿಂದ ಒಳಗಡೆಗೆ ಬೆಳಕು ಕಲ್ಪಿಸಲಾಗಿದೆ. ಆದರೆ ಜಾಸ್ತಿ ಬೆಳಕು ನಿಮಗೆ ಸಿಗದಂತೆ ಜಾಣ್ಮೆ ವಹಿಸಿದ್ದಾರೆ.

ಕ್ಯಾಂಪಿನ ಹಿಂಬಾಗದ ನೋಟ.

ಹಾಗೆ ಹಿಂದುಗಡೆ ಬಂದರೆ ನಿಮಗೆ ಎರಡು ರೂಂ ನೈಸರ್ಗಿಕ ಉಪಯೋಗಕ್ಕಾಗಿ ಇದೆ. ಅಲ್ಲೂ ಸಹ ಒಂದು ಚಿಕ್ಕ ವರಾಂಡ ಇದೆ. ಮೆಟ್ಟಿಲು ಇಳಿದರೆ ನಿಮಗೆ ಎದುರು ಕಾಣಸಿಗುವುದೇ ಅರಣ್ಯ ಸಿಬ್ಬಂದಿ ವಿಶ್ರಾಂತಿ ಗೃಹ ಹಾಗು ಅಡಿಗೆ ಮನೆ , ಹೌದು ಇಲ್ಲಿನ ಸಿಬ್ಬಂದಿ ಅಂದರೆ ಫಾರೆಸ್ಟ್ ವಾಚರ್ಸ್ , ಗಾರ್ಡ್ಸ್ ಇಲ್ಲೇ ಉಳಿದು ಹಗಲು ರಾತ್ರಿ ಕರ್ತವ್ಯ ನಿರ್ವಹಣೆ ಮಾಡುತ್ತಾರೆ. ಅವರ ಆಹಾರಕ್ಕೆ ಪ್ರತೀ ಮೂರು ದಿನ ಅಥವಾ ವಾರಕ್ಕೊಮ್ಮೆ ಕೊಳ್ಳೆಗಾಲದಿಂದ ರೇಶನ್ ಸರಬರಾಜು ಆಗುತ್ತದೆ. ಇಲ್ಲಿಗೆ ಕರ್ತವ್ಯಕ್ಕೆ ಬಂದ ಸಿಬ್ಬಂದಿ ತನ್ನ ಸಂಸಾರ ವನ್ನು ಮರೆತು ಕಾಡಿನ ಈ ಜಾಗದ ಸುತ್ತ ಮುತ್ತ ಇರುವ ಕಾಡನ್ನು ಸಂರಕ್ಷಿಸಬೇಕಾದ ಹೊಣೆ ಹೊತ್ತಿದ್ದಾರೆ. ಈ ಬಂಗಲೆಗೆ ಅಡಿಗೆಯವರು ಇಲ್ಲದ ಕಾರಣ ಇವರೇ ಅಡಿಗೆ ಬಟ್ಟರು , ನಮಗೂ ಸಹ ತಮ್ಮ ಕೈಚಳಕದಿಂದ ತಮ್ಮ ಕರಾಮತ್ತು ತೋರಿದರು. ಇನ್ನು ಜೀವ ಜಲ ನೀರು ವ್ಯವಸ್ಥೆ ಇಲ್ಲಿಗೆ ಇಲ್ಲಾ, ಸುಮಾರು ಎರಡು ಕಿ.ಮಿ ದೂರದಲ್ಲಿರುವ ಒಂದು ಜರಿಯಿಂದ ನೀರು ತರಬೇಕು. ನಾವೂ ಸಹ ಅರಣ್ಯ ಸಿಬ್ಬಂಧಿ ಜೊತೆ ಕಾರಿನಲ್ಲಿ ಹೋಗಿ ದಟ್ಟ ಕಾಡಿನ ನಡುವೆ ಹರಿಯುತ್ತಿದ್ದ ಜರಿಯಿಂದ ಸುಮಾರು ಆರು ದೊಡ್ಡ ಕ್ಯಾನುಗಳಲ್ಲಿ ನೀರನ್ನು ತಂದೆವು. ಕೆಲವೊಮ್ಮೆ ನೀರನ್ನು ತರಲು ತೆರಳುವ ಇವರಿಗೆ ವನ್ಯ ಜೀವಿಗಳ ದರ್ಶನ ಆಗುವುದಾಗಿ ತಿಳಿದು ಬಂತು. ನೀರನ್ನು ಹೊತ್ತು ತಂದ ನಾವು ಮತ್ತೊಮ್ಮೆ ಕಾಫಿ ಹೀರಿ ಅಲ್ಲೇ ಇದ್ದ ಒಬ್ಬ ವಾಚರ್ ರೊಂದಿಗೆ ಸ್ವಲ್ಪ ಕಾಡಿನ ಚಾರಣಕ್ಕೆ ಹೊರಡಲು ಸಿದ್ದವಾಗುತ್ತಿದ್ದೆವು.

ಕಾಡಿನ ನಡುವೆ ಸೈಕಲ್ಲಿನಲ್ಲಿ ಡ್ಯೂಟಿ

ಬಂಗಲೆಯ ಸಮೀಪದ ಕಾಲು ಹಾದಿಯಲ್ಲಿ ಒಬ್ಬ ವ್ಯಕ್ತಿ ರಭಸದಿಂದ ಸೈಕಲ್ಲಿನಲ್ಲಿ ನಮ್ಮ ಕಡೆ ಬದು ಇಳಿದ , ವಿಚಿತ್ರ ವಾಗಿದ್ದ ಆತನನ್ನು ನೋಡಿ ಅಚ್ಚರಿಯಾಯಿತು. ದಟ್ಟ ಕಾಡಿನಲ್ಲಿ ಭಯವಿಲ್ಲದೆ ಸೈಕಲ್ಲಿನಲ್ಲಿ ಸುತ್ತುವ ಈ ಮನುಷ್ಯನನ್ನು ಪರಿಚಯ ಮಾಡಿಕೊಟ್ಟರು. ಆ ವ್ಯಕ್ತಿಯೂ ಸಹ ಅರಣ್ಯ ಇಲಾಖೆಯ ವಾಚರ್ ಎಂಬುದಾಗಿ ತಿಳಿಯಿತು.

ಕಾಡಿನ ಚಾರಣಕ್ಕೆ ಮಾರ್ಘ ದರ್ಶಿ ಹಾಗು ರಕ್ಷಕ ಇವರೇ.

ದಟ್ಟ ಕಾನನದ ಸೌಂದರ್ಯ .

ಇನ್ನು ಚಾರಣಕ್ಕೆ ನಮ್ಮನ್ನು ಕರೆದುಕೊಂಡು ಒಬ್ಬರು ಹೊರಟರು.ಸುಂದರ ನಿಶ್ಯಬ್ದದ ಕಾಡಿನಲ್ಲಿ ನಾವೂ ಮಾತಿಲ್ಲದೆ ಅವರನ್ನು ಹಿಂಬಾಲಿಸಿದೆವು , ದಟ್ಟ ಕಾಡಿನ ನಡುವೆ ಸುಮಾರು ಆರು ಕಿ.ಮಿ. ಚಾರಣ ಮಾಡಿ ಅಲ್ಲೇ ಇದ್ದ ಬಂಡೆಗಳಿಂದ ಕೂಡಿದ್ದ ಸಣ್ಣ ಬೆಟ್ಟ ಏರಿ ನಿಸರ್ಗ ಸೌಂದರ್ಯ ನೋಡುತ್ತಾ ಸುಮಾರು ಅರ್ಧ ಘಂಟೆ ಕಳೆದೆವು

ಬಿಳಿಗಿರಿ ಬೆಟ್ಟದ ಶ್ರೇಣಿ

ನಾವು ನಿಂತಿದ್ದ ಜಾಗದಿಂದ ಬಿಳಿಗಿರಿ ಬೆಟ್ಟದ ಶ್ರೇಣಿ ಸುಂದರವಾಗಿ ಗೋಚರಿಸಿತ್ತು. ಆಗಲೇ ಸೂರ್ಯ ಅಸ್ತಂಗತ ನಾಗಿ ಮಬ್ಬು ಕಟ್ಟಲು ಕವಿಯಲು ಶುರುವಾಗಿತ್ತು, ನಮ್ಮ ಚಾರಣ ವಾಪಸ್ಸು ಸಾಗಿತ್ತು.ಸುಮಾರು ಕತ್ತಲೆಯಲ್ಲಿ ಕಾಡಿನ ನಡುವೆ ಎಡವುತ್ತಾ, ಬೀಳುತ್ತಾ, ನಡೆಯುತ್ತಾ, ಸಾಗು ಸುಮಾರು ಮುಕ್ಕಾಲು ಘಂಟೆ ನಡೆದು ಬುರುಡೆ ಬಂಗಲೆ ಹೊಕ್ಕೆವು,

ರಾತ್ರಿಗೆ ಅಡಿಗೆ ಮಾಡಿಕೊಟ್ಟ ಗೆಳೆಯರು .

ಅಲ್ಲೇ ಇದ್ದ ಅರಣ್ಯ ಇಲಾಖೆಯ ಗೆಳೆಯರು ಅಡಿಗೆ ತಯಾರಿ ಮಾಡಿದ್ದರು, ನಾವೂ ಸಹ ಅಲ್ಲಿಗೆ ತೆರಳಿ ಅಡಿಗೆಯ ಸಹಾಯಕರಾದೆವು, ಅನ್ನಾ , ಚಪಾತಿ , ಅವರೆಕಾಳಿನ ಸಾರು, ಮಜ್ಜಿಗೆ ಇತ್ಯಾದಿ ಮಾಡಿ ಪ್ರೀತಿಯಿಂದ ನೀಡಿದರು. ಊಟ ಮುಗಿದಾಗ ರಾತ್ರಿ ಎಂಟು ಘಂಟೆ , ಬೆಳಕಿಲ್ಲದ ರಾತ್ರಿಯಲ್ಲಿ ಬೆಂಕಿಯಮುಂದೆ ಕುಳಿತು ಹರಟೆ ಹೊಡೆಯುತ್ತಾ ಸ್ವಲ್ಪ ಹೊತ್ತು ಕಳೆದೆವು. ಮರುದಿನ ಹೋಗಬೇಕಾದ ಜಾಗಗಳ ಬಗ್ಗೆ ಮಾಹಿತಿ ತಿಳಿಯುತ್ತಾ "ಹೊನ್ನ ಮೇಟಿ ಕಲ್ಲು " ಬೆಟ್ಟಕ್ಕೆ ಹೋಗುವುದೆಂದು ತೀರ್ಮಾನಿಸಿದೇವು . ಹಾಗೆ ಕಾಡಿನ ಸಿಬ್ಬಂದಿಗಳು ನಮಗೆ ವೀರಪ್ಪನ್ ಜೊತೆ ತಾವು ಕಳೆದ ದಿನಗಳನ್ನು ಸವಿಸ್ತಾರವಾಗಿ ತಿಳಿಸುತಿದ್ದರು. ಹೌದು ಇವರಲ್ಲಿ ಕೆಲವರನ್ನು ಇಲ್ಲಿಂದ ವೀರಪ್ಪನ್ ಸುಮಾರು ಹತ್ತೊಂಭತ್ತು ದಿನಗಳ ಕಾಲ ಅಪಹರಿಸಿ ಇಟ್ಟುಕೊಂಡಿದ್ದ ,ಹಾಗುನಂತರ ಬಿಡುಗಡೆ ಮಾಡಿದ್ದ ವಿಚಾರಗಳನ್ನು ಅಪಹರಣ ಗೊಂಡಿದ್ದ ವ್ಯಕ್ತಿಯಿಂದ ಕೇಳುತ್ತಿದ್ದರೆ ರೋಮಾಂಚನವಾಗುತ್ತಿತ್ತು.ಇಲ್ಲಿಗೆ ಬಂದ ನಂತರ ಇಲ್ಲಿ ಕಾಡುಗಳ್ಳ ವೀರಪ್ಪನ್ ನನ್ನು ಸ್ವಲ್ಪ ದಿನ ಇಟ್ಟಿದ್ರು ಅಂತ ಗೊತ್ತಾಯ್ತು!![ಈ ಬಗ್ಗೆ ಹಲವು ಅಂತರ್ಜಾಲಗಳಲ್ಲಿ ವೀರಪ್ಪನ್ ಹಾಗು ಈ ಪ್ರದೇಶದ ನಂಟಿನ ಬಗ್ಗೆ ಮಾಹಿತಿ ಹರಿದಾಡ್ತಿದೆ ] ವೀರಪ್ಪನ್ ಹಿಡಿಯೋಕೆ ಯಾಕೆ ಅಷ್ಟು ಕಷ್ಟ ಆಯ್ತು ಅಂತ ಇಲ್ಲಿಬಂದ್ರೆ ಗೊತ್ತಾಗುತ್ತೆ!! ನಾವೋ ಪಾಪ ಪೋಲಿಸ್ ನವರನ್ನು ಹಾಗು ಎಸ.ಟಿ.ಎಫ್ ನವರನ್ನು ಆ ಕಾಲದಲ್ಲಿ ಬೈದಿದ್ದ ಬಗ್ಗೆ ಪಶ್ಚಾತ್ತಾಪ ಪಟ್ವಿ ,ಇಲ್ಲಿನ ದಟ್ಟ ಕಾಡಿನಲ್ಲಿ ಕಗ್ಗತ್ತಲೆಯಲ್ಲಿ ಕಾಡು ಪ್ರಾಣಿಗಳ ನಡುವೆ ವೀರಪ್ಪನ್ ಹಿಡಿಯುವುದು ನಾವು ಅಂದುಕೊಂಡಷ್ಟು ಸುಲಭವಾಗಿರಲಿಲ್ಲ.

ನಾವಿದ್ದ ಪ್ರದೇಶದಲ್ಲಿ ಕಗ್ಗತ್ತಲೇ ನೋಟ

ಇಲ್ಲಿರುವ ಚಿತ್ರವನ್ನೇ ನೋಡಿ ಇಂತಹ ಕಾಡಿನಲ್ಲಿ ವೀರಪ್ಪನ್ ನಿಮ್ಮ ಪಕ್ಕ ಇದ್ದರೂ ನಿಮಗೆ ಗೊತ್ತಾಗದು, ಅಂತಹ ಸನ್ನಿವೇಶದಲ್ಲಿ ನಾವು ಪಟ್ಟಣದಲ್ಲಿ ಕುಳಿತು ವೀರಪ್ಪನ್ ಹಿಡಿಯದೆ ಇದ್ದ ಬಗ್ಗೆ ಮಾತಾಡುವುದು ಬಾಲಿಶ ಅನ್ನಿಸಿತು. ಕಥೆ ಕೇಳುತ್ತಾ , ನಮಗೆ ನಿದ್ರಾದೇವಿಯ ಕರೆ ಬಂದು ಮಲಗಲು ಹೊರಟೆವು. ರಾತ್ರಿ ಪೂರ ಕಾಡಿನ ಆಸರೆಯಲ್ಲಿ ನಾಗರೀಕ ಪರಿಸರದ ಹೊರಗೆ ನೆಮ್ಮದಿಯ ನಿದ್ದೆ ಬಂದಿತ್ತು. ಮುಂಜಾವಿನಲ್ಲಿ ಎಚ್ಚರವಾದಾಗ ದೂರದಲ್ಲಿ ಹಕ್ಕಿಗಳ ಚಿಲಿಪಿಲಿ, ನವಿಲಿನ ಕೂಗು ಕೇಳುತ್ತಲಿತ್ತು....!!!! ......... ಹಕ್ಕಿಗಳ ಹಾಡು ಕೇಳುತ್ತಿರಿ ಮುಂದಿನ ಸಂಚಿಕೆಯಲ್ಲಿ ಮುಂದುವರೆಯೋಣ .

..ಗುಂಡಾಲು ಅಣೆಕಟ್ಟಿನಿಂದ ಬುರುಡೆ ಕ್ಯಾಂಪಿನ ಕಾನನದ ಹಾದಿಯಲ್ಲಿ !!!ಕಾಡಿನ ಅಡಚಣೆಗಳ ದಾಟಿ ....ನೆನಪಿನ ಪುಟ ..02 ...

2012-01-17T19:55:00.006+05:30

ನಮ್ಮ ಕಾಡಿಗೂ ಬಂದಿರಾ !!!!

ನಮಸ್ಕಾರ ಮೊದಲ ಸಂಚಿಕೆಯನ್ನು ಆಪ್ತವಾಗಿ ಸ್ವೀಕರಿಸಿದ ನಿಮಗೆ ಧನ್ಯವಾದಗಳು. ಬನ್ನಿ ಎರಡನೇ ಸಂಚಿಕೆಯಲ್ಲಿ ನಿಮಗೆ ಕಾಡಿನ ಹಾದಿಯಲ್ಲಿ ಎದುರಾಗುವ ಅಡಚಣೆಗಳ ಪರಿಚಯ ಮಾಡಿಸುತ್ತೇನೆ. ಹೌದು ನಾವೀಗ ಹೋಗುವ ಜಾಗವೇ ಹಾಗಿದೆ ................???????

ಮೊದಲ ಸಾರಿ ಇಲ್ಲಿಗೆ ಬರುವ ಮೊದಲು "ಕಾಕನ ಕೋಟೆಯ" ಕಾಡನ್ನು ನೋಡಿದ್ದ ನಮಗೆ ಈ ಕಾಡು ಸಹ ಅದೇ ರೀತಿ ಇರಬಹುದೆಂಬ ಅನಿಸಿಕೆ ಇತ್ತು ...!!! ಬಂದಮೇಲೆ ಇಲ್ಲಿನ ಪರಿಸರ ಒಡ್ಡುವ ಸವಾಲು ನಮಗೆ ಪ್ರಕೃತಿಯ ಹೊಸ ವಿಚಾರಗಳನ್ನು ಕಲಿಸಿಕೊಟ್ಟಿತು.ನಮ್ಮ ತಂಡ ಇಲ್ಲಿಗೆ ಸುಮಾರು ಎರಡು ಸಾರಿ ಹೋದಾಗಲೂ ಹೊಸ ಹೊಸ ಅನುಭವ ಹೊತ್ತು ಬಂದಿದೆ.

ಕೊಳ್ಳೆಗಾಲದಿಂದ ಗುಂದಾಲ್ ಆಣೆಕಟ್ಟು ಹಾದಿಯಲ್ಲಿ ಅಣೆಕಟ್ಟೆ ಪ್ರದೇಶದ ಸಮೀಪ ಎಡಕ್ಕೆ ಒಂದು ಹಾದಿ ನಿಮ್ಮನ್ನು ಅಲ್ಲೇ ಇರುವ ಚೆಕ್ ಪೋಸ್ಟ್ ಬಳಿ ಕರೆದುಕೊಂಡು ಹೋಗುತ್ತದೆ. ಚೆಕ್ ಪೋಸ್ಟ್ ಬಳಿ ಸ್ವಲ್ಪ ನಿಲ್ಲೋಣ ಬನ್ನಿ ,

ಗುಂಡಾಲ್ ಅಣೆಕಟ್ಟಿನ ವಿಹಂಗಮ ಸುಂದರ ನೋಟ

ನಿಮಗೆ ಅಲ್ಲಿ ಸುಂದರ ಪರಿಸರದ ಅನಾವರಣ ಆಗುತ್ತದೆ.

ಸುಂದರ ನಿರ್ಮಲವಾದ ವಾತಾವರಣ ನೀಡುವ ಸ್ವಾಗತ ಇದು

ಗುಂದಾಲ್ ದ್ಯಾಮಿನಿಂದ ಬುರುಡೆ ಕ್ಯಾಂಪಿಗೆ ಸುಮಾರು ೨೩ ಕಿ.ಮೀ ದೂರದ ದಟ್ಟ ಕಾನನದ ಹಾದಿ !! ಒಂದು ಬದಿ ಆಳವಾದ ಕಣಿವೆ ಇನ್ನೊದು ಬದಿ ಕಾಡಿನ ಬೆಟ್ಟದ ಗೋಡೆ ಮಧ್ಯೆ ಸಾಗಿದ ನಮ್ಮ ಕಾರು ಸುಮಾರು ೧೦ ಕಿ.ಮೀ/ಘಂಟೆಗೆ ವೇಗದಿಂದ ತೆವಳುತ್ತಿತ್ತು !! ಮೊದಲ ಸ್ವಾಗತ ನೀಡಿದ ಸಾರಂಗಗಗಳ ಜೋಡಿ ಮೊಡಿಮಾಡಿತ್ತು!!!

ಸ್ವಾರ್ಥ ವಿಲ್ಲದ ನಮ್ಮ ಕಾಡಿಗೆ ಸ್ವಾಗತ ನಿಮಗೆ

.

ದಾರಿಯಲ್ಲಿ ಕಡಿದಾದ ಬಂಡೆಗಳು ನೀರಿನ ಜಾರಿಯಲ್ಲಿ ಅಡಗಿ ವಾಹನಗಳು ತೊಂದರೆಗೆ ಈಡಾಗುವ ಸಂಭವ ವಿದ್ದುಆತಂಕದಲ್ಲೇ ಸಾಗಿ ಗುರಿ ಮುಟ್ಟಿದೆವು. ಕಾನನದ ಹಾದಿಯ ಪಯಣ ನಮ್ಮನ್ನು ಮುಧಗೊಳಿಸಿ ಮೋಡಿ ಮಾಡಿತ್ತು !!!

ಹಾದಿಯಲ್ಲಿ ಸಿಕ್ಕ ಸಾರಂಗ

ಹಾಗೆ ತೆವಳಿದ ನಾವು ಕಾಡಿನೊಳಗೆ ಲೀನವಾಗಿ ಸಾಗಿದೆವುಮುಂದೆ ನಮಗೆ ಲಾಂಗೂರ್ ಕೋತಿಗಳ ಹಿಂಡು ಹಾದಿಯ ಪಕ್ಕದಲ್ಲಿದ್ದ ಮರಗಳಲಿ ಗೋಚರಿಸಿದವು.ನಾವೂ ಸಹ ನಿಧಾನವಾಗಿ ಕಾರಿನಿಂದ ಇಳಿದು ನೋಡಿದರೆ ನಮ್ಮನ್ನು ಕಂಡು ಕೋತಿಗಳು ಪರಾರಿಯಾಗಲು ಆರಂಭಿಸಿದವು. ಕ್ಷಣಾರ್ಧದಲ್ಲಿ ಇಡೀ ತಂಡ ಮಾಯವಾಗಿತ್ತು ಫೋಟೋ ತೆಗೆಯಲು ಆಗಲಿಲ್ಲವಲ್ಲಾ ಅಂತಾ ಯೋಚಿಸುತ್ತಾ ನಿಂತಿದ್ದ ನಮಗೆ ಅದ್ಭುತ ಚಿತ್ರ ಒಂದು ಸಿಕ್ಕಿತು.

ಲಾಂಗೂರ್ ಕೋತಿ ಹಾರಿದೆ ನೋಡಿ !!!

ಲಾಂಗೂರ್ ಕೋತಿಯೊಂದು ಮರದಿಂದ ಇನ್ನೊಂದು ಮರಕ್ಕೆ ಹಾರುವ ಸಾಹಸ ಕಂಡು ವಿಸ್ಮಯ ವಾಯಿತು ಕಾಡಿನ ಹಾದಿಯೇ ಹಾಗೆ ಯಾವ ಕ್ಷಣದಲ್ಲಿ ಯಾವ ಪವಾಡ ಬೇಕಾದರೂ ಆಗಬಹುದು , ಕ್ಷಣಾರ್ಧದಲ್ಲಿ ನಿಮಗೆ ಅರಿವಿಲ್ಲದೆ ಅಪಾಯ ಎದುರಾಗಬಹುದು , ಅಥವಾ ನೀವೂ ಊಹಿಸದೇ ಇರುವ ಪ್ರಾಣಿಯ ದರ್ಶನವಾಗಬಹುದು , ಕಾಡಿನ ಹಾದಿಯಲ್ಲಿ ಇಂತಹ ಹಲವಾರು ಘಟನೆಗಳು ನಮಗೆ ಆಗಿದೆ .ಆದರೆ ಇಂತಹ ಘಟನೆಗಳಿಂದ ನಮ್ಮ ತಾಳ್ಮೆ ಹೆಚ್ಹಾಗಿ ಪರಿಸರದ ಜೊತೆ ಹೇಗೆ ಹೊಂದಿಕೊಳ್ಳಬೇಕೂ ಎಂಬ ರೀತಿಯನ್ನು ನಾವು ಕಲಿತೆವು .

ಕಾಡಿನ ಹಾದಿಯಲ್ಲಿ ತೆವಳುತ್ತಾ ಕಾಡಿನ ಪರಿಸರ ಅನುಭವಿಸುತ್ತಾ ತೆರಳಿದ್ದ , ಸವಾಲಿನ ರಸ್ತೆಯಲ್ಲಿ ನಗು ನಗುತ್ತಾ ಕಾರ್ ಡ್ರೈವ್ ಮಾಡುತ್ತಿದ್ದರೂ ವೇಣುಗೋಪಾಲ್ , ನಮ್ಮ ತಂಡದ ಕಾರು ಚಾಲನೆಯ ಅತ್ಯಂತ ಅನುಭವಿ ಇವರು , ಕಾಡಿನ ದುರ್ಗಮ ಹಾದಿಯಲಿ ತಾಳ್ಮೆಯಿಂದ ಯಾವುದೇ ಕಾರಣಕ್ಕೂ ಪರಿಸರಕ್ಕೆತೊಂದರೆ ಮಾಡದೆ ಕಾರ್ ಚಾಲನೆ ಮಾಡುವ ಕಾರ್ಯದಲ್ಲಿದ್ದರು. [ನಾವಿದ್ದ ಚಿಕ್ಕ ಕಾಡಿನ ಹಾದಿಯಲ್ಲಿ ಒಂದು ಕಡೆ ಬೆಟ್ಟ ಹಾಗು ಕಾಡು ಮತ್ತೊಂದು ಬದಿಯಲ್ಲಿ ಆಳವಾದ ಪ್ರಪಾತ ಇದ್ದು ವಾಹನ ಚಾಲನೆಯಲ್ಲಿ ಸ್ವಲ್ಪ ತಪ್ಪಿದರೂ ಕಾರು ಇಲ್ಲಾ ಬೆಟ್ಟಕ್ಕೆ ಡಿಕ್ಕಿ ಯಾಗುವುದು ಅಥವಾ ಪ್ರಪಾತಕ್ಕೆ ಜಾರುವುದು ಆಗುತ್ತಿತ್ತು. ] ಸ್ವಲ್ಪ ಹಾದಿ ಕ್ರಮಿಸಿದ ನಮಗೆ ಎದುರಾಗಿದ್ದು ಒಂದು ಬಂಡೆಯ ಇಳಿಜಾರು ಹಾದಿ ಅದರಮೇಲೆ ಹರಿಯುತ್ತಿರುವ ಜರಿ !!!

ಕಾಡಿನ ಮದ್ಯೆ ಎದುರಿಸಿದ ಸವಾಲು

ಸ್ವಲ್ಪ ತಪ್ಪಿದರೂ ಪ್ರಪಾತ ಸೇರಿಸುವ ಹಾದಿಯಲ್ಲಿ ವೇಣು ಮೆರೆದ ಸಾಹಸ.

ನಮ್ಮ ಕಾರು ಇಳಿಜಾರಿನ ಬಂಡೆಯ ಮೇಲೆಹರಿವ ಜರಿಯೊಳಗೆ ಹಾದು ಹೇರ್ ಪಿನ್ ನಂತಹ ಏರುಮುಖದ ಹಾದಿಯ ದಿನ್ನೆಯನ್ನು ಹತ್ತ ಬೇಕಾಗಿತ್ತು. ಜೊತೆಗೆ ಬಂಡೆಯ ಮೇಲೆ ಹರಿವ ನೀರಿನ ಒಳಗೆ ಕಲ್ಲಿದ್ದು ಅದು ಕಾರಿನ ಎಂಜಿನ್ಗೆ ಹಾನಿಮಾಡುವ ಭಯ ಒಂದು ಕಡೆ , ಆದರೂ ನಮ್ಮಲ್ಲಿ ಕೆಲವರು ಕಾರಿನಿಂದ ಇಳಿದು ಸುತ್ತಲ ಪರಿಸರ ಅವಲೋಕನ ಮಾಡಿ ಯಾವುದೇ ಅಪಾಯ ವಿಲ್ಲವೆಂದು ಕಾತರಿ ಪಡಿಸಿಕೊಂಡು ಕಾರನ್ನು ಆ ಹಾದಿಯಲ್ಲಿ ಮೇಲೆತರಲು ವೇಣುಗೋಪಾಲ್ ಗೆ ಅನುವುಮಾಡಿದೆವು. ಅವರೂ ಸಹ ಚಾಕಚಕ್ಯತೆ ಯಿಂದ ಕಾರನ್ನು ಬಂಡೆ ದಾಟಿಸುವಲ್ಲಿ ಯಶಸ್ವಿಯಾದರು .ಇಪ್ಪತ್ತ ಮೂರು ಕಿ.ಮಿ ದಾರಿಯನ್ನು ಕ್ರಮಿಸಲು ಸುಮಾರು ನಾಲ್ಕು ಘಂಟೆ ಕಾಲ ತೆಗೆದು ಕೊಂದು ಸಾಹಸದಿಂದ ಬುರುಡೆ ಕ್ಯಾಂಪಿಗೆ ಬಂದೆವು...............................................ಇಲ್ಲಿ ವೀರಪ್ಪನ್ ಇದ್ದನಂತೆ .!!!!!!

ಬುರುಡೆ ಕ್ಯಾಂಪ್